Хууль зүйн сайд Х.Тэмүүжин өчигдөр сэтгүүлчидтэй “зангиагүй уулзалт” хийлээ. Энэ үеэр түүнээс сүүлийн үед олны анхаарлыг татаад буй хэргүүдийн талаар зарим зүйлийг тодруулав.
-Эрх мэдэл, албан тушаалтнуудтай холбоотой хэрэг тэгэсхийгээд өнгөрдөг. УИХ-ын гишүүн Ё.Отгонбаярыг яг ямар үндэслэлээр шалгаж байгаа юм бэ?
-Ё.Отгонбаярт гишүүнтэй холбогдох хэргийг шалгаж байна. Түүнийг бусдаас авлига нэхсэн, мөн эхнэрийнх нь данстай холбоотой асуудлаар шалгаж байгаа нь үнэн. Гэхдээ данстай холбоотой асуудал дээр давхар бичилтүүд байгааг үгүйсгэхгүй.
-“Жаст”-ын Ш.Батхүүгийн хэрэг юу болж байна. Нийт хэчнээн төгрөгийн хохирол учруулаад байна вэ?
-Өнөөдөр манай улс 140 гаруй сая ам.долларын өрөнд орчихсон байна. Энэ мөнгийг тухайн банк нь Засгийн газраас нэхэж байгаа. Тиймээс шалгалтыг нэлээн нарийн явуулж байна. Ш.Батхүү хуурамчаар гарын үсэг үйлдсэн гэдгээ хүлээсэн.
-“Ноёд” группийн захирал Г.Буяндоржийг яг ямар хэргээр саатуулж байгаа вэ?
-Хэд хэдэн хэргээр саатуулан шалгаж байна. Хэргийг шалгах явцад Г.Буяндорж өөрөө ч бусдад залилуулсан байж болох нөхцөл байдал үүссэн. Харин хуулийн байгууллагаас дуудсан цагт нь ирэхгүй, оргон зайлсан гэдэг үндэслэлээр цагдан хорьсон.
-УИХ-ын гишүүн Н.Номтойбаярын хэрэг ямар шатандаа явж байна. Н.Номтойбаяр өөрийгөө хүн хутгалаагүй, хууль хяналтынхан ташаа мэдээлэл өгсөн гэх юм билээ?
-Үнэн худлыг шүүх тогтооно. Харин хутгалуулсан гэх иргэн цагдаагийн байгууллагад гомдол гаргаж, мэдүүлгээ өгсөн. Тиймээс Н.Номтойбаяр хутгалсан, үгүй гэдэг асуудлыг ярих нь утгагүй. Ямартай ч хэн нь эхэлж маргаан үүсгэснийг нарийн шалгаж тогтооно. Мунзуй Г.Нямдорж гэх иргэн өмнө нь ял шийтгэл эдэлж байсан. Энэ хүнтэй холбоотой маргаан бий. Ер нь УИХ-ын гишүүн байх эсэх нь хамаагүй хэрэг үйлдсэн бол хариуцлага хүлээх ёстой.
-Саяхан Налайх дүүргийн нутаг дэвсгэрт нэг иргэнийг зургаан удаа буудаж хөнөөсөн хэрэг гарлаа. Эл гэмт хэргийн ертөнцийн “атаман”-ны хүү холбоотой болох нь тогтоогдсон шүү дээ?
-Энэ хэргийг ард гэмт хэргийн ертөнцөд өөрийгөө атаман гэж үздэг байсан хүмүүсийн хүүхдүүд холбогдсон гэдэг асуудал яригдаж байгаа. Гэмт хэргийн ертөнцөд зартай гурван хүн хуулийн байгууллагаар шалгагдаж байгаа юм билээ. Тиймээс рецедив гэмт хэрэгтнүүд хуулиас гадуур явах боломжгүй. Хэрэг хийсэн л бол хариуцлагаа хүлээнэ.
-Эрүүдэн шүүх сандалтай холбоотойгоор ЦЕГ-ын дэд даргад хариуцлага тооцсон нь ямар учиртай вэ?
-Эрүүдэн шүүх сандлыг оруулж ирсэн хүн Д.Сандаг-Очир генерал. Тэр тэтгэвэртээ гарсан. Мөн ажлын байрны тодорхойлолт, чиг үүргээрээ мөрдөн байцаалтад ийм сандал хэрэглэх эсэхийг шийдэх эрх мэдэл нь тэргүүн дэд даргад байдаг. Үүргээ биелүүлээгүй учраас хариуцлага тооцож ажлаас нь чөлөөлсөн байгаа.
-Хятадад хар тамхины хэрэгт холбогдсон Хууль зүйн яамны Төрийн нарийн бичгийндарга асан Х.Баясгалангийн хүүг эх орондоо ялтан шилжүүлэх гэрээгээр авч ирэх тухай асуудал яригдаж байгаа гэсэн үнэн үү?
-Хятадад гэмт хэрэг үйлдээд ял эдэлж байгаа иргэдээ эх оронд нь авч ирэх асуудал яригдаж байгаа. Тухайн ял эдэлж буй иргэд өөрсдөө хүсэлт гаргадаг. Хэний хүүхэд байх нь хамаарахгүйгээр хүсэлт гаргасан бол боломжтой хэмжээнд ажиллах үүрэгтэй.
Б.Төрбат